بعد مستوى معين من الخبرة في أي تكنولوجيا انت تقريبا بتقدر توصل لاى معلومة بسهولة فيها نتيجة تراكم الخبرات باستخدامها وعارف تبحث ازاى وفين … لما توصل للمرحلة دي هيبقى من المفيد ليك تبدا تتعلم تكنولوجيا جديدة غيرها حتى لو على سبيل المعرفة لان دا هيوسع افكارك ويزيد من قدرتك على اختيار الحل الانسب للمشكلة اللي بتواجهها وكمان هيزود فرصك تتقبل في شركات تانية بسبب تعدد مهاراتك انا كنت شغال php developer لمدة اكتر من 5 سنين ومكنش عندي المرونة اني اشتغل بحاجة غير ب php لغاية ما جربت اعمل سيرفس كانت مطلوبة ب nodejs ولاقيت الموضوع مش بالصعوبة اللي كنت متخيلها وحاليا انا شغال dotnet developer. هتكلم عن اهم النقط اللي ممكن تساعدك وانت بتتعلم:
المرونة:خلى عندك مرونة وقابلية انك تتعلم حاجة جديدة لو في فرصة لدا في الاول وفي الاخر دا اضافة ليك وزيادة خبرة انت software developer مش مجرد متقن للغة معينة وبس كدا
منطقة الراحة: اول حاجة بتيجي في بالك ان ليه اتعلم حاجة جديدة ما انا شغال ب stack كويس وعارف اتعامل معاه وبتطور نفسك تتعلم ايه الجديد فيه ايه اللي يخليني اتعلم حاجة جديدة؟الحقيقة دا كويس لفترة معينه لكن مش هتفضل طول عمرك شغال بنفس ال stack ومتعرفش حاجة غيره كدا انت بتعتمد اعتماد كلي على ال stack دا ومش شايف غيره وبتعرض نفسك لتحدي لو ال stack دا خرج برا السوق هتعمل ايه؟
طيب هل كدا انا ببدأ من الصفر: واحدة من المخاوف اللي هتفكر فيها هى انك لما تتعلم stack جديد مثلا ان كدا انت بتبدا من الاول ودا مش حقيقي لان انت لو عندك اساس كويس ساعتها تعلم stack جديد مش هيبقى بالصعوبة اللي انت فاكرها اه هتبقى بطئ شوية على ما تتعلم ال syntax الجديد وايه اللي موجود في ال stack اللي هتتعلمه لكن يظل الاساس واحد.
فريق العمل:من الحاجات المهمه اللي ممكن تنجز معاك في الوقت وانت بتتعلم تكون شغال مع فريق عمل بيساعد بعضه يكون فيه ناس عندهم خبره اكبر منك لان ساعتها لو في حاجة غلط هتعملها هتلاقي اللي يوجهك للصح ولو في مشكلة وقعت فيها هتلاقي حلها بسهوله.
طيب هل دا معناه اني استقيل من الشغل واتعلم stack جديد؟ لا طبعا انت شغال زي مانت وبتتعلم في وقت الفراغ او في الاجازة ولو لاقيت فرصة افضل توكل على الله لكن فكرة اني اتعلم وانا قاعد في البيت مش مناسبة نهائي وممكن تطول على ما تلاقي شغل تاني.
الاساس واحد انت بس غيرت ال tool اللي بتستخدمها ودا مع الوقت بيديك ميزة مش موجودة عند ناس كتير.طريقة اختيار حل المشاكل اللي هتقابلك هتبقى انسب لان بدل ما كنت بتحل كل المشاكل اللي بتقابلك بال stack اللي انت عارفه بس انت بقى عندك معرفة ب stack تاني وعيوب ومميزات كل واحد وامتى استخدم دا وامتى ما استخدمش دا.
وهنا لازم تاخد بالك من نقطة مهمه انت بتتعلم علشان تساعد نفسك وتعلي مستواك ويبقى عندك من المرونة اللي تساعدك تاخد القرارات المناسبة بناءا على علم سواء كنت developer اوarchitecture او ايا كان ال position اللي موجود فيه لكن دا مش معناه اني اجرب في مشاريع الشركة اللي شغال فيها بدون علم لان دا ممكن يعرض الشركة لنفقات زيادة هى في غنى عنها.اخر حاجة انت بتاخد بالآسباب مش أكتر استعن بالله والتوفيق من عند ربنا
